Romans 15

1Aria i kekanep Mua Maneka opora wiar opam-ikaimik nain yiena kookalowa me yiam ookikua. I feenap onowa-ke eliw, wi yiena teeria epaskun Mua Maneka ookimik, nain sira papako ookowa kema pinarimik. Wi nain kekelka wia wuiyen. 2Neemi i yiam kui-kuisow yiena teeria epaskun baliwep ikok Mua Maneka opora kekanowa wiar opam-ikauk naep wia kekanowiyen. 3Moram Krais pun ona me wame kema suuwak, weetak. Mua Maneka opor ara oko feenap ikua nain ookak,

“Mua Maneka wi mua eena opor samora maemi nefa samorimik nain yos-ke akuawiyem.”
(Someka 69.9)

4Aria iiriw ekera opor unowa Mua Maneka-ke maeya siisimep-puamik, i nain wiar miimap amisa aawowa-ke naep siisimemik. Ne opora nain-ke kema eliwa yiemi yia kekanowiya. Naeya i kekanep naap ikok Mua Maneka maa mauwa maiya nain kema moke ikok makena urufiyen.

5Aria Mua Maneka-ke yia kekanoweya i kekanep kekelka ikaimik. Naapeya o faremkun ona nia asipeya ni unowiya kema epaskun ikok Krais sira ookami niam asipam-ikowen. 6Naeya ni unowiya kema epaskun ikok unow onaiya Mua Maneka eena yiena Maneka Yeesus Krais wiawi nain unuma wiar fakeram-ikowen.

7Aria Krais nia kookalep nia aawep nia saliwak. Naapeya ni sira wiar ookami mua oko wia saliweka. Ni naap oniwkin Mua Maneka unum maneka aawinon. 8Moram Krais wame porop wi Yuuda wia asipinen naep ekapok. Mua Maneka ona iiriw wiena Yuuda nembesir wiamiya opora kaikak nain makena arowinen naep. 9Ne me nain muutiw, fain pun, wi owow oko oko wia kemalep Krais sesekak. Nain naep o unuma wiar fakerimik, eena Mua Maneka opora maek naap. Feenap,

“Naapeya yo wi miiw unowa teeria unowa wiamiya ikok unuma nefar fakerinen. Ne no unuma nefa fakerowa someka awinen.”
(2 Samuel 22.50, Someka 18.49)

10Ne opor oko feenap,

“Ni owow oko, ni Mua Maneka teeria wi Isrel wiamiya manek akena kemeleka.”
(Lo 32.43)

11Ne oko pun feenap maek,

“Ni owow oko oko ni unowiya yiena Maneka kuisow nain unuma wiar fakereka. Ne o unuma fakerowa someka aweka.”
(Someka 117.1)

12Aria profet Aisaiya-ke iiriwiw feenap maep-puak,

“Owow saria oko ikoka Yesi kerekera-pa imenarinon. Os-ke miiw unowa owow unowa wia urufam-ikainon. Naapeya wi pokow eliwa o wiar aawowa nain arewikuan.”
(Aisaiya 11.10)

13Yo feenap nia naep maiyem, ni Mua Maneka opora wiar opam-ikaiwkin kema nia sonominok. O eena opora makena nia opomiya nain. Naeya ni manek akena kemelami kema eliwiw ikowen. Ne Ewar Eliwa-ke nia kekanowam-ikaeya Mua Maneka opora maek nain makena-ke naep wiar opap kema maneka suuwam-ikowen.

Pol wi owow oko wia naep uuwam-ikua

14Aria emar unowik, yo sira baliwep niar amisarep maiyem, ni anane mua oko sira eliwa wia oniman. Ne pun ni Mua Maneka sira unowa nain baliwep wiar amisareman. Naapeya mua oko suule wiemi ni nieniw niam kakenowa pepek eraman. 15Makena ni naap ikeman, nain yo parosifa nia siisimomiyem fain opor ara papako opor kekanowa siisimem. Nain ni nia kemapawowa naep naap onam. Moram Mua Maneka ona Yeesus Krais uuwowa fain yiemi efa asipiya. 16Naeya yo uuwami ni owow oko oko Yeesus Krais opor eliwa nia maakem-miawiyem. Ne ni Mua Maneka patirowa miir onoma-pa nia pekamkun kemelap nia aawok. Ne Ewar Eliwa-ke niamiya ikaeya ona teeria kakeniw ikowen. Yo muut nain uuwiyem.

17Naapeya yo Mua Maneka uuwowa uuwam-miok Yeesus Krais unuma-pa yame iriyem. 18Ne yo maa oko me mainen, fain muutiw mainen. Yo Krais-ke efa asipeya ni owow oko oko ona opora nia maakemi maa miililina unowa imenamkun ni opora wiar opaman. 19Ewar Eliwa-ke kekanowa yieya maa miililina imenam nain naap onami Krais opor eliwa owow unowa iiwawun wia maakurumem, Yerusalem-pa onoma wuap naap ikiwemi owow unowa nain saawirinowap Ilirikum-pa fuunem. 20Yo sira feenap, wi owowa eena Krais opor eliwa me miimowa pepen akena ikemik nain muutiw wiar ikiwep wia maakem-miawiyem. Ne wi iiriw wia maakiwkin miimap ikemik nain weetak. Yo mua oko iiriw uuwak neeke me anian pasinen. 21Yeesus opora wia maakowa nain profet Aisaiya opor ara oko feenap maek,

“Wi owowa eena iiriw o-ko me wia maakemik nain ikoka wia maakiwkin urufikuan. Ne wi iiriw o opora-ko me wiar miimamik nain ikoka miimap amisarikuan.”
(Aisaiya 52.15)

Yo opora nain ookami oniyem.

Pol wi Rom wia urufowa kema ikua

22Aria yo uuwowa-pa korinep ikem, naapeya yo ikiwep ni nia urufowa maem-ikem nain me pepek. 23Nain yo aakisa kame unowa fain uuwowa welawam. Yo ni nia urufowa nain iiriw ekera maem-ikem. 24Naapeya aakisa niar ikiwowa naiyem. Nain yo Spen ikiwemi ni niar fuunep lawisiw niar ikainen. Niamiya ikok kema eliwa aawep era-ko imenomiwkin Spen ikiwinen, yo kema naap maiyem. 25Nain yo aakisa Yerusalem ikiwep-puap ni niar ikiwinen. Wi Yeesus teeria eena Yerusalem-pa ikemik nain maa marew, oram akena ikemik. Ne wi Masedonia wi Akaiya naap teeria nain wia asipowa naep maamuma, maa unowa fiirimiwkin wia pikiwominen. 27Wi wiena kookalep naap onamik. Iiriw wi Yuuda-ke ikiwemi wi owow oko oko Mua Maneka opora wia maakem-miawemik. Naeya wi sira eliwa wia kiripomami maamuma wia asipuk. Naapeya sira eliwa wia onimik nain eliwa-ke wia naiyem. 28Naapeya yo wi maamuma nain wia pikiwomap-puap nainiw kirep Spen ikiwemi ni niar fuuninen. 29Yo amisarem, yo niar ikiwiyem nain Krais kema yia sonomeya yiena unow onaiya iiwawun manek akena kemeliyen.

30Emar unowik, feenap, yiena Maneka Yeesus Krais unum maneka wiar kema suuwimik. Ne Ewar Eliwa-ke kema yieya i yiam kookalep epaskun ikemik. Yo nain naep feenap oneka naiyem, yo uuwowa yoowa oniyem fain efamiya ikeka, feenap, Mua Maneka fariwkin efa asipam-ikainok. 31Naeya Yuudia kame ikiwiyem nain wi Yuuda Yeesus Krais me ookami efa iiwuarimik nain me efa samoruk. Ne oko feenap, wi Yeesus teeria Yerusalem-pa ikemik nain maamuma wia pikiwomiyem fain kemelap aawuk. 32Naap ikok Mua Maneka ona era-ko wuomeya-na palanowiw ni niar ikiwinen. Neek niamiya ikok kema wueliwa ininen. 33Aria Mua Maneka kema eliwa niinok. Makena.